Siglir tar il cuntegn
Inhalt

Svizra Tadlar radio è il hit: 9 da 10 persunas taidlan mintga di

Il radio en Svizra ha in auditori fidaivel. 9 da 10 persunas taidlan mintga di radio. Quai mussan las cifras da Mediapulse ch’èn vegnidas publitgadas la gievgia per l’emprim mez onn 2017.

Dunna cun radio.
Legenda: Il radio tutga tar il mintgadi da las Svizras ed ils Svizers. Keystone

Ils perscrutaders da Mediapulse han analisà quant radio ch’i vegn taidlà en las grondas regiuns linguisticas da la Svizra:

  • 114 minutas per di en Svizra tudestga
  • 112 minutas per di en Svizra taliana
  • 97 minutas per di en Romandie

Cumpareglià cun l'onn passà han las Svizras ed ils Svizzers tadlà en tuttas regiuns linguisticas 4 minutas pli pauc radio.

Ils emetturs da la SRG SSR tegnan las grondas parts dal martgà

Las pli grondas parts dal martgà han ils emetturs da la SRG SSR: En la Svizra taliana èn quai radund ¾ dal martgà ed en las autras duas regiuns grondas radund 2/3 dal martgà.

Malgrà ils buns resultads ha la SRG SSR pers en tut las trais grondas regiuns linguisticas parts dal martgà a la concurrenza dals radios privats.

Nov sistem da mesirar a partir dal 2018

Mediapulse publitgescha las cifras uffizialas dal diever da radio duas giadas ad onn. Ella mesira il consum-live da radio via cabel, UKW, DAB+ e Webradio tar la populaziun svizra sur 15 onns.

A partir dal 2018 vegn Mediapulse a mesirar tenor atgnas indicaziuns cun ina nov’ura da mesirar.

RR novitads 14:00