Siglir tar il cuntegn
Inhalt

Svizra Syngenta spetga vess sin ChemChina

Curt avant ch'il concern chinais surpiglia il concern d'agro-chemia svizzer Syngenta noda quel ina sperdita da gudogn e svieuta.

In bajetg dal concern d'agro-chemia svizzer Syngenta che ha preschentà sias cifras.
Legenda: Il concern d'agro-chemia svizzer Syngenta ha preschentà sias cifras. Keystone

Cumpareglià cun l'onn avant saja il gudogn sa sbassà per 12 pertschient sin stgars 1,18 milliardas francs ha communitgà il concern basilais.
La svieuta da Syngenta è sa reducida per 5 pertschient sin radund 12,79 milliardas francs. Surtut l'emprim mez onn dal 2016 ha il concern gì da cumbatter cun il ferm dollar. En connex cun la profitabilitad haja Syngenta dentant cuntanschì la finamira, punctuescha il schef dal concern, Erik Fyrwald en il rapport. La marscha da EBITDA saja restada sin il nivel da l'onn avant.

Transacziun cun ChemChina

Syngenta quinta ch'il concern chinais ChemChina vegn a surpigliar il concern svizzer il segund quartal da quest onn. Enfin ussa hajan els survegnì la lubientscha da 13 uffizis. I manchia anc il gea da la Brasilia, il Canada, la China, la UE, l'India, il Mexico ed ils Stadis Unids da l'America.

RR novitads 7:30