Siglir tar il cuntegn

Header

Navigaziun

Il logo cun la scrittira blaua dal concern Syngenta avant in bajetg brin.
Legenda: Il bajetg dal concern Syngenta a Basilea. Reuters
cuntegn

Svizra Syngenta reagescha sin ferm franc

Il concern da chemia agrara svizzer, Syngenta haja prendì mesiras preventivas en connex cun il ferm franc svizzer. Las consequenzas na vegnian perquai betg ad esser grondas.

Sch'ins cumpareglia las cifras dals ultims onns alura na dettia quai betg ina gronda differenza, ha ditg il schef da finanzas da Syngenta, John Ramsay a l'agentura da novitads Reuters. Ord vista actuala duain tranter auter er predominar ils avantatgs dal pretsch dad ieli bas. Syngenta examineschia tuttas opziuns per reducir ils custs en Svizra ha precisà Ramsay. Il mument na dettia dentant nagins novs plans da spargn tar Syngenta.

Ils plans da stritgar 1’800 da las bun 28'000 plazzas enfin il 2018 restian. Questa mesira è vegnida decidida il 2013, suenter ch'il concern da chemia agrara ha registrà in gudogn marcantamain pli pitschen.

3% dapli svieuta

Il concern ha fatg l'onn passà ina svieuta da passa 15 milliardas francs, quai èn 3% dapli che l'onn avant. Pervi da custs da restructuraziun saja il gudogn dentant sa sminuì per 2% sin bunamain 1,5 milliardas francs, communitgescha il pli grond producent da meds da protecziun per plantas.