La societad naziunala da rait Swissgrid ha gì in bun onn da fatschenta. Il resultat avant tschains e taglia (EBIT) è creschì per 8,5% sin bun 153 milliuns francs. Il gudogn è schizunt s’augmentà per 9% sin 88 milliuns francs, communitgescha Swissgrid.
Sin fundament da las bunas fatschentas vegn proponì d'auzar la distribuziun dal gudogn da 13 sin passa 21 milliuns francs. Per ils onns che vegnan vul Swissgrid investir mintg'onn 180 milliuns francs en la modernisaziun da la rait.
Rickenbacher succeda a Ramming
Plinavant ha Swissgrid annunzià ch'Andreas Rickenbacher daventa nov represchentant dals chantuns en il cussegl d'administraziun. El succeda a Fadri Ramming ch'è sa retratg.
