Siglir tar il cuntegn
cuntegn

Svizra Svizra vinavant attractiva per interpresas

La Svizra è vinavant fitg attractiva per interpresas quai che pertutga la taglia. En l'Europa han sulet las inslas dal Chanal ed intgins stadis da l'ost taglias sin il gudogn pli bassas ch'ils chantuns cun taglias favuraivlas.

vista sin la chasa federala la damaun baud
Legenda: La Svizra è fiscalmain fitg attractiva per interpresas. Reuters

Quai resulta dal rapport da taxas «Swiss Tax Report» da l'interpresa da cussegliaziun KPMG. Sche la refurma da l'imposiziun da taglia sin interpresas III fa però naufragi stoppia la Svizra quintar da perder questa posiziun avantagiusa ed uschia er entradas da taglia da 2,7 milliardas francs.

En quest cas fissan las perditas da taglia bler pli autas che las mesiras da remplazzament che vegnan discutadas il mument. La Confederaziun quinta cun custs da la refurma da 1,3 fin 1,6 milliardas francs, tut tenor co la refurma vegn formulada.

Cun il reschim da taglia actual po la Svizra dentant tegnair sina ferma posiziun. Tar la taglia sin interpresas èn ils chantuns fiscalmain ils pli bunmartgads sulet davos las Inslas dal Chanal ed intgins pajais da l'Europa dal sid e da l'ost. La concurrenza la pli dira deriva da l'Irlanda e las duas plazzas da finanzas Hongkong e Singapur.

Tenor la KPMG conferma il rapport da taglia actual ch'il trend engiu da las tariffas da taglia è sa franà. Las tariffas da taglia sin gudogn èn sa reducidas ils ultims 10 onns en media per 3,42%. Ils onns 2015 e 2016 dentant mo anc per 0,01 respectiv 0,08%.

RR novitads 12:00