En vista a la guerra en l’Ucraina n’han las relaziuns tranter la Svizra e l’Uniun europeica nagina prioritad. Quai è il facit dal president da la Confederaziun, Ignazio Cassis, suenter in inscunter cun la presidenta da la cumissiun da l’UE, Ursula von der Leyen a l’ur dal Forum mundial d’economia a Tavau.
Nagin inscunter
Cura che la «fasa chauda» da la guerra saja vargada dovri dentant ina schliaziun, uschia Cassis. Ursula von der Leyen n'ha betg vulì prender posiziun en chaussa envers l'agentura da novitads Keystone-SDA. Cuntrari ad auters onns datti quest onn nagin inscunter formal tranter il president da la Confederaziun e la presidenta da la cumissiun da l'UE a Tavau.
Nova strategia
Il responsabel da l’UE per las relaziuns cun la Svizra ha ditg l'entschatta da l'emna ch'el fiss pront da vegnir en Svizra per sa discurrer. Avant in onn ha la Svizra rut giu ils discurs davart ina cunvegna da basa cun l'UE. La nova strategia è da vinavant persequitar la via bilaterala. Auter che tar la cunvegna da basa na duai betg tut vegnir regulà en general, mabain singul en mintga sectur.