Siglir tar il cuntegn

Header

cuntegn

Svizra Svizra surpiglia da l’Italia voluntari requirents d’asil

La Svizra surpiglia aifer las proximas tschintg emnas ils emprims 200 requirents d'asil da l'Italia e quai voluntari. Quai ha confermà l'Uffizi federal per migraziun. Enfin uss ha la Svizra en l’acziun da repartiziun da fugitivs da l’UE surpiglià 34 persunas da l’Italia ni la Grezia.

En l’acziun da repartiziun da fugitivs vul l’Uniun europeica reparter 160’000 requirents d’asil da l’Italia e la Grezia sin ils ulteriurs pajais da l’Uniun europeica. Enfin uss n’è capità betg propi bler. Uss duai questa acziun dentant vegnir accelerada.

Sco il secretariat da stadi per migraziun ha ditg saja quai stà necessari da schliar ils problems birocratics. Uss saja dentant tut pront da recepir ils emprims 200 requirents d’asil, ha ditg ina pledadra.

En tut vul la Svizra recepir 900 requirents d’asil ord l’Italia e 600 requirents d’asil ord la Grezia, ha conferma la pledadra dal secretaria statala per migraziun. Repartids vegnian migrants da pajais cun bunas schanzas da survegnir asil sco la Siria u l'Eritrea. Quai ha il Cussegl federal decidì gia avant in onn.

La Svizra realisescha las mesiras – l’UE fraina

Ils blers stadis da l’Uniun europeica frainan il mument cun recepir voluntari fugitivs. Uschia èn en l’entira UE fin uss stgars 4’000 fugitivs dals 160’000 planisads vegnids repartids da l’Italia e la Grezia sin ils ulteriurs pajais. La Pologna per exempel refusa dal tuttafatg da exequir la veglia da Brüssel.

RR novitads 09:00

Artitgels legids il pli savens