Da chalar d'importar gas russ dal tuttafatg fiss fitg difficil. Quai tant per la Svizra sco era per l'entira Europa, ha ditg il minister da l'economia Guy Parmelin. La Svizra n'haja nagin deposit da gas. En pli na possia il stadi betg intervegnir, perquai ch'interpresas privatas cumprian gas al martgà, e repartian quel lura a la clientella. La Svizra saja totalmain dependenta dad imports dad ieli e gas, di Parmelin. Ins veglia gia dapi daditg minimar questa dependenza, per exempel cun energia alternativa. Quai dovria dentant temp.
Sche la furniziun vegniss propi stritgada, lura savess il provediment da la Svizra minimar il donn. Perquai dettia reservas obligatoricas. En pli savess ins dumandar la populaziun da stgaudar pli pauc l'enviern. Dapi emnas vegnia lavurà vi da plans e vi d'ina priorisaziun per il cas d'urgenza.
