- Il Cussegl federal ha declerà la «situaziun extraordinaria» e rinforza anc ina giada las mesiras per cumbatter il coronavirus.
- A partir da mesanotg ston tuttas stizuns/butias e locals vegnir serrads en Svizra, quai almain enfin ils 19 d'avrigl. Be butias da mangiativas ed instituziuns da sanadad restan averts.
- I dat uss er controllas als cunfins cun la Germania, la Frantscha e l'Austria. Burgaisas e burgais svizzers che sa chattan en l'exteriur duain immediat turnar a chasa. Els duain organisar lur return sur ils organisaturs.
- «Ussa sto mintga persuna far in sforz», ha declerà Simonetta Sommaruga per rumantsch. Sche memia bleras persunas ston en l'ospital, lura pon er autras operaziuns impurtantas betg pli vegnir fatgas. Perquai saja impurtant che mintgin realiseschia ch'el u ella pudess er esser pertutgada u pertutgà.
- Tegnair distanza saja uss il pli impurtant! Sommaruga, Berset ed Amherd han fatg in appell a l'entira populaziun da sa tegnair vid las mesiras. Quai saja il pli impurtant per franar il virus. Nus appellain a tuttas ed a tuts en Svizra: Tuts ston sa tegnair vid las mesiras. Uss valia da garantir la protecziun per la populaziun vulnerabla.E la populaziun vulnerabla duai restar a chasa. Er els èn supplitgads da prender serius la situaziun.
- Entant datti 2'330 persunas testadas positiv sin il coronavirus. Ils ospitals sajan dentant preparads bain per ils cas, ha declerà Daniel Koch dal BAG.
Quests scumonds valan a partir da mesanotg:
- Occurrenzas publicas e privatas èn scumandadas.
- Tuttas stizuns, martgads, restaurants, bars sco era manaschis da divertiment, da temp liber sco museums, bibliotecas, kinos, chasas da teater e concerts, centers da sport, bogns e territoris da skis ston serrar.
- Plinavant vegnan er serrads manaschis nua ch'i n'è betg pussaivel da tegnair avunda distanza in da l'auter, sco per exempel coiffeurs e studios da cosmetica.
Sommaruga ha anc ina giada fatg cler ch'il provediment da l'entira populaziun cun mangiativas, medicaments ed autras chaussas dal mintgadi è garantì.
Avert restan:
- Stizuns da mangiativas, take-aways, cantinas d'interpresas, servetschs da furniziun da mangiativas ed apotecas restan avertas.
- Er lavuratoris per meds da transport, pon restar avert. Tut questas instituziuns ston dentant tegnair en las mesiras da l'Uffizi federal per sanadad BAG pertutgant igiena e distanza.
- Ospitals, clinicas e praticas da medis restan avertas, ston dentant desister da tuttas operaziuns e terapias che n'èn betg urgentas.
Persunas periclitadas spezialmain fan lur lavur davent da chasa. Sche quai n'è betg pussaivel, dat il patrun ad els vacanzas. Lur paja survegnan els vinavant.
Canortas duain restar avertas:
- Per uffants che na pon betg vegnir survegliads privat, han ils chantuns da procurar per pussaivladads da tgira.
- Canortas na pon betg vegnir serradas, sch'i na dat betg in'alternativa da tgira per ils uffants.
Fin 8'000 schuldads da l'armada stattan a disposiziun
Il Cussegl federal parta dal fatg che las autoritads civilas vegnan a duvrar dapli agid da l'armada en il proxim temp. La dumonda per agid vegnia a crescher. Perquai augmenta el il cunfin maximal per il servetsch d'assistenza dad 800 sin 8'000 militarists. Quai vala fin la fin zercladur 2020.
L'armada duai sustegnair il sistem da sanadad cun surpigliar lavurs da logistica. Plinavant duai ella sustegnair il corps da polizia en il segment da segirezza.