Siglir tar il cuntegn
cuntegn

Svizra Svizra: Scumond da punctaders da laser ferms

En l’avegnir è il possess da punctaders da laser ferms, uschenumnads «laserpointers», scumandà en Svizra. Quai ha decis il parlament cun approvar la nova lescha davart la protecziun da radis privlus. Il scumond da posseder tals apparats è in dals puncts che vegnan reglads tras la lescha nova.

In laserpointer en in maun.
Legenda: En faus mauns in arma privlusa – perquai scumonda il parlament a partir dad uss gia il possess da laserpointers ferms. Keystone

En la debatta tar la nova lescha davart la protecziun da radis privlus era cler d’emprima nà, ch’il parlament haja dad agir pertutgant ils punctaders da laser ferms.

Privel tras punctaders da laser ferms incontestà

Sche quels radis tutgan la retina en l’egl dad ina persuna po quai en il cas pli mal tschorventar ella. Adina puspè datti attatgas sin pilots o manischunzs da locomotivas. Perquai po a partir dad uss er vegnir chastià il possess dad in punctader da laser ferm.

Meglra protecziun da tuttas sorts da radis privlus

Cun la lescha nova vul la Confederaziun proteger la populaziun meglier da radis privlus. Quels vegnan er duvrads tar lasers medicinals ed en solariums.

Tar ils solariums duai vegnir controllà en avegnir sch'ils utilisaders èn infurmads bain avunda davart ils privels e sche las perscripziuns da segirezza vegnan respectadas.

RR novitads 11:00