Siglir tar il cuntegn

Header

Navigaziun

Eritreans en Svizra.
Legenda: Er l’ONU appellescha da betg refusar Eritreans, perquai ch’i dettia là massivas violaziuns dals dretgs umans. Keystone
cuntegn

Svizra Svizra prenda si adina pli paucs Eritreans

La Confederaziun refusa adina dapli dumondas d’asil da fugitivs ord l’Eritrea. Il zercladur n’eran anc 24 cas betg vegnids tractads, il settember èn quai sur 770 dumondas betg tractadas. Quai ha ditg ina pledadra dal Secretariat statal per migraziun envers la televisiun da la svizra franzosa RTS.

L’augment resultia cunzunt or da la pussaivladad da la Confederaziun da trametter enavos fugitivs en l’Italia. Durant il zercladur èn vegnidas refusadas 77 dumondas, l’avust 245 ed il settember 772. Quai è in augment per il factur 30 durant 4 mais.

Trametter enavos en l'Eritrea saja nagin'opziun

Dapi intgins mais vegnan las bleras dumondas d’asil da persunas or da l’Eritrea. L’avust aveva la cussegliera federala Simonetta Sommaruga fatg attent, ch’i na saja nagin’opziun da trametter enavos ils requirents d’asil en lur patria en l’Africa da l’Ost.

L'Italia stuess prender si fugitivs

Il dumber da fugitivs ord l’Eritrea ch’èn arrivads sur l’Italia en Svizra è s’augmentà marcantamain la stad passada, ha ditg la pledadra. Tenor la cunvegna da Dublin stoppia l’Italia perquai s’occupar da lur dumondas d’asil. La cunvegna prevesa ch’ils pajais han 2 mais temp per respunder ad ina dumonda d’asil. Passa quai temp senz’ina resposta, vala la dumonda d’asil sco acceptada silenzius.

RR novitads 09:00