Siglir tar il cuntegn
Inhalt

Svizra Svizra participescha a fonds europeic per segirtad interna

La Svizra duai contribuir 20,6 milliuns francs al fonds europeic per segirtad interna. Il Cussegl dals chantuns ha sco emprim cussegl approvà ina cunvegna supplementara correspundenta.

Controllas a l'eraoport da Turitg.
Legenda: A l'eroport da Turitg vegnan controllads las persunas che entran il spazi da Schengen. Keystone

Il Cussegl dals chantuns ha dà glisch verda per pajair mintg'onn 20,6 milliuns francs en in fonds per la segirtad interna en il spazi Schengen. Cun ils daners duain vegnir sustegnids stadis europeics che han custs auts per la protecziun dals cunfins exteriurs da Schengen. Quai po esser il cas sch'ils pajais han lungs cunfins territorials u maritims ubain eroports internaziunals da gronda impurtanza.

Finamira è la segirezza

Vitiers duain ils daners da l'UE er pussibilitar da reagir spert ed effectiv sin crisas. La finamira dal fonds saja la segirezza a l'intern dals cunfins da Schengen, ha argumentà la ministra da la giustia, Simonetta Sommaruga. Ils daners sajan investids bain. Il Cussegl dals chantuns ha sco emprim cussegl approvà la cunvegna supplementara e quai cun 33 cunter 1 vusch e tar 5 abstenziuns.

A las basas legalas ha il parlament gia dà il consentiment avant in onn cun acceptar la participaziun da la Svizra a l'instrument da successiun dal fonds dals cunfins exteriurs. La cunvegna supplementara reglescha uss la participaziun finanziala da la Svizra.

Retroactiv davent dal 2014

Il basegn finanzial dal fonds per ils onns 2014 fin 2020 vegn taxà sin 2,76 milliardas Euros. Vi da quel duai la Svizra sa participar retroactiv davent dal 2014. La Svizra paja 20,6 milliuns e survegn percunter dal fonds 3 milliuns francs per mesiras da segirtad naziunalas. Quai pon per exempel esser investiziuns en l'infrastructura dals eroports.

RR novitads 11:00