Siglir tar il cuntegn

Header

Navigaziun

Vista sin ina chasa e chamin che lascha ora fim.
Legenda: Enfin il 2030 duai la Svizra reducir las emissiuns per 50%. Keystone
cuntegn

Svizra Svizra duai reducir emissiuns per 50%

Il Cussegl federal vul reducir per 50% las emissiuns da gas cun effect da serra enfin il 2030. Almain 30% da las reducziuns vul el cuntanscher en il pajais, 20% cun projects en l'exteriur.

Per questas finamiras duai la Svizra s'obligar en il contract successur per il protocol da Kyoto. Quest contract duai vegnir suttascrit la fin da l'onn a Paris, scriva il Cussegl federal. Planisà è ina convenziun dal clima che cuntegn finamiras da reducziuns liantas.

La Svizra è responsabla per 0,1% da las emissiuns da gas da serra sin l'entir mund.

Verds pretendan 75%

Ord vista dals Verds èn las finamiras da proteger il clima memia bassas. Els pretendan ina reducziun da l'emissiun da gas da serra fin l'onn 2030 per almain 75%.

Era las organisaziuns d'ambient WWF e VCS crititgeschan la finamira sco turpegius bass. Il WWF scriva che schizunt ils Stadis Unids hajan fixà finamiras pli autas. La Svizra guntgeschia sia responsabladad e speria ch'auters pajais schlian il problem per ella, uschia il WWF.