Il Cussegl naziunal pretenda ch'il Cussegl federal suttascriva la cunvegna per scumandar armas atomaras e ch'el laschia ratifitgar quella uschè spert sco pussaivel dal parlament. El ha acceptà ina moziun dal cusseglier naziunal socialdemocrat Carlo Sommaruga da Genevra cun 99 cunter 87 vuschs.
A chaschun da la radunanza generala da l'ONU a New York l'onn passà haja la Svizra votà per la cunvegna, ha ditg Carlo Sommaruga. I na saja perquai betg chapaivel ch'il Cussegl federal n’haja anc adina betg suttascrit quella.
Il Cusseglier federal Ignazio Cassis ha sinaquai respundì che la Svizra s’engaschia gia dapi daditg per in scumond e la destrucziun da las armas atomaras. Il problem saja ch’ils pajais che possedan gia armas atomaras na vegnian betg a suttascriver la cunvegna per in scumond da quellas. Per quels pajais sajan ellas da gronda muntada strategica. Avant che signar la cunvegna stoppia la Svizra perquai sclerir tge consequenzas che quella pudessi avair per las relaziuns internaziunalas. Impurtant saja da betg periclitar la cunvegna per impedir la derasaziun d’armas atomaras.
Ina stretga maioritad dal Cussegl naziunal na leva dentant betg spetgar ed ha sustegnì la moziun che va ussa el Cussegl dals chantuns.
RR novitads 17:00