La Svizra deplorescha ch’ils Stadis Unids na fan betg pli part dal Cussegl dals dretgs umans da l’ONU. Il gremi saja fundamental per la protecziun e la promoziun dals dretgs umans. Quai scriva il Departament federal d’affars exteriurs.
Il cussegl, che ha sia sedia a Genevra, haja in effect concret, quai betg il davos cun sias missiuns e cumissiuns d'inquisiziun che vegnan tramessas en regiuns cun situaziuns e cundiziuns inquietantas, quai cun il mandat da l'ONU hai num el communiqué da l’EDA.
La Svizra accepti dentant la decisiun suverana dals Stadis Unids da l'America e vegni era il futur a collavurar a moda constructiva cun els. Ultra da quai vegni la Svizra vinavant a s'engaschar per la promoziun, la protecziun ed il respect dals dretgs umans - dentant era per dapli effizienza da l'instituziun da l’ONU a Genevra.
Er il secretari general da l’ONU, Antonio Guterres, deplorescha la decisiun dals Americans. El ha suttastritgà l’impurtanza da las Naziuns Unidas per la structura dals dretgs umans globala. Tenor l’incumbensada per affars exteriurs da l’Uniun europeica, Federica Mogherini, pericliteschia questa decisiun la rolla dals Stadis Unids sco defensur da la democrazia.
Israel beneventa decisiun
In'autra reacziun ha mussà l’Israel che beneventa la decisiun dals Stadis Unids. I sa tractia dad ina decisiun curaschusa cunter las manzegnas ch’il cussegl derasia. Quai ha ditg il primminister Benjamin Netanjahu.
Ils Stadis Unids avevan argumentà lur decisiun en emprima lingia cun la tenuta dal Cussegl dals dretgs umans. Tenor ils Americans saja quella numnadamain anti-israeliana. Gia avant in onn avevan ils Stadis Unids pretendì da refurmar il cussegl. Tranter auter han els pretendì ch’il focus dal cussegl sin il stadi Israel vegnia reducì.
RR novitads 11:00