Svizra daventa liom diplomatic tranter l'Iran ed Arabia Saudita

La Svizra daventa activa en il conflict tranter l'Arabia Saudita e l'Iran. La Svizra vegnia a represchentar ils interess da l'Arabia Saudita en l'Iran e viceversa ils interess da l'Iran en l'Arabia Saudita.

Il minister da l'exteriur Didier Burkhalter durant las contractivas en la chapitala saudiaraba Riad.

Legenda da maletgs: Il minister da l'exteriur Didier Burkhalter durant las contractivas en la chapitala saudiaraba Riad. SRF, MAD

Questa funcziun d’intermediatura da la Svizra ha l'EDA, il Departament federal d'affars exteriurs, communitgà suenter ina visita dal cusseglier federal Didier Burkhalter en la chapitala saudiaraba Riad.

Stabilitad en la regiun è er en l'interess da la Svizra

Durant sia visita a Riad saja Burkhalter s’inscuntrà cun il retg Salman ed il minister da l’exteriur. Il cusseglier federal haja discutà las relaziuns tranter l’Iran e l’Arabia Saudita sco er las tensiuns en la regiun, oravant tut quellas en la Siria ed il Jemen.

Il pass diplomatic svizzer succeda perquai ch'ils dus pajais Iran ed Arabia Saudita avevan interrut lur relaziuns diplomaticas suenter ch'ils Saudiarabs avevan executà in spiritual schiit.

Tenor l'EDA porschia la Svizra quest servetsch pervi da las bunas relaziuns ch'ella haja cun omadus pajais. Il departament scriva, ch’i saja er l’interess da la Svizra da contribuir a la stabilitad en la regiun.

RR novitads 14:00