- Exposiziun da fotografias davant il bajetg l’ONU mussa demonstrants dals ultims onns sin la Place des Nations
- Sin ina da las 58 fotografias fan demonstrants responsabel il president tirc Erdogan per l’attatga mortala sin in giuven durant ils protests da Gezi dal 2013
- Il consulat tirc pretenda d’allontanar la fotografia
- La regenza da la citad sa cusseglia il mardi, il fotograf insista sin la libertad d’exprimer l’opiniun
Ankara è grittentada pervi d’ina fotografia ch’è exponida a Genevra, sin la quala demonstrants crititgeschan il president tirc Recep Tayyip Erdogan. Il consulat tirc ha tenor «Le Courrier» perquai pretendì d’allontanar la fotografia, rapporta SRF sin lur pagina d’internet. La regenza da la citad da Genevra vegnia tenor in pledader a tractar la chaussa il mardi suentermezdi.
Demir Sönmez, in fotograf genevrin cun ragischs curdas ed armenas, expona sin la Place des Nations fin dumengia 58 fotografias da demonstraziuns ch’han gì lieu sin questa. Tranter questas fotografias sa chatta er quella ch’è vegnida crititgada – ella datescha dal mars 2014. Sönmez fa tenor la gasetta genevrina attent sin la libertad d’exprimer l’opiniun e spera perfin sin ina prolungaziun da l’exposiziun.
Demonstrants fan responsabel Erdogan per la mort da Berkin
Il maletg mussa in transparent, sin il qual Erdogan vegn fatg responsabel per la mort dal giuvenil. Il primminister da lez temp duain las activitads da protest dal giuven avair disturbà: «Jau hai num Berkin Elvan, la polizia ha mazzà mai sin cumond dal primminister tirc», è scrit sin il transparent fotografà.
A l’ur dals protests da Gezi la stad 2013 ad Istanbul era Elvan vegnì tutgà d’ina cartuscha da gas lacrimogen e blessà mortalmain. Tenor ses geniturs era il giuven sin via per cumprar paun cura ch’el era vegnì tutgà. Ils 11 da mars 2014 era il giuvenil mort en la vegliadetgna da 15 onns, quai suenter plirs mais en in coma.
Tenor indicaziuns da SRF na datti fin uss nagina posiziun da l’ambassada tirca a Berna.
RR novitads 17:00