Anc adina vegnan legidas gasettas en Svizra. 93% da la populaziun en Svizra legian regularmain in'ediziun stampada. Quai è in punct da pertschient pli pauc che la primavaira. Uschia communitgescha la Societad anonima per la perscrutaziun da las medias WEMF.
La cifra dals utilisaders dad online resta stabila. La midada da gasettas sin palpiri tar ediziuns d'online è vegnida pli plauna, è dentant tuttina da sentir.
Il dumber da lecturs da gasettas ed illustradas resta dapi in onn stabil e quai sin in aut nivel. La reducziun da la svieuta tar la reclama na possian ins betg declerar raziunalmain.
«20 Minuten» legì il pli savens
Il medium che vegn legì il pli savens è anc adina «20 Minuten». La derasaziun en Svizra tudestga, en Svizra romanda ed en il Tessin munta a 3,2 milliuns utilisadras ed utilisaders. 1,924 milliuns ediziuns sin palpiri ed 1,286 milliuns per di dovran l'ediziun online. Sin plazza dus è il Blick.
Gasettas da tradiziun perdan
Tar il Tages-Anzeiger sa sminuescha l'utilisaziun online sco era quella da las gasettas sin palpiri sin total 665'000: gasettas sin palpiri 417'000 ed online 248'000.
La Neue Züricher Zeitung ha stuì constatar ina sminuziun sin 252'000 lecturs. Online han els dentant pudì constatar in lev creschament sin 161'000. Il medem fenomen – reducziun gasettas sin palpiri e creschament online – han era las gasettas Der Bund, Berner Zeitung ed az nordwestschweiz pudì constatar.
Gasettas da dumengia perdan
La gasetta Basler Zeitung perda lecturs da gasettas sin palpiri sco era online. En Svizra franzosa han 24 Heures e Le Matin constatà il medem. Le Temps e Tribune de Genève perdan lecturs da gasettas sin palpiri, constateschan dentant in lev creschament online. Il medem ha era il Corriere del Ticino constatà.
Tar las gasettas da dumengia resta il Sonntags Blick la gasetta la pli populara: Ella cuntanscha la pli gronda derasaziun cun radund 583'000 lecturas e lecturs suandada da la SonntagsZeitung cun 581'000 lecturs.
RR novitads 06:00