En in studi scriva la TA Swiss, che chasas da medias vegnian adina pli fitg en miserias finanzialas. Ellas na sajan en l'avegnir strusch pli en il stan da metter a disposiziun resursas avunda per in schurnalissem independent. Quel saja dentant indispensabel per ina democrazia.
Prender in exempel dals pajais scandinavs
Il studi propona da modifitgar il sistem actual da finanziaziun. La Confederaziun sustegna las medias stampadas cun in agid indirect da 30 milliuns francs ad onn. Empè da quest sustegn, valità sco betg effizient, duessan las medias privatas profitar da sustegn via impostas e da mesiras d’encuraschament da vart dal stadi.
Uschia vegnia quai gia fat en pajais scandinavs, descriva il studi. En il nord da l’Europa dettia in sistem da finanziaziun statala, che funcziuna senza influenzar las decisiuns redacziunalas
Sustegnair vinavant il service public
A quai che reguarda il service public, la SRG SSR, duaja quel vegnir subvenziunà vinavant per pudair preschentar in’offerta attractiva, oravant tut online, per pudair cuntanscher in public pli giuven, affirmeschan ils perscrutaders. Da renunziar a reclama valiteschan els sco via pussibla.
Tschertgar il dialog cun ils utilisaders
TA-Swiss intunescha da l’autra vart, che las medias stoppian esser en dialog cun lur public, per exempel via las raits socialas per utilisar uschia las furmas schurnalisticas novas che permettan dad interagir cun ils utilisaders.
RR novitads 11:00