Tenor communicaziun da l’Uffizi per examinaziun d’accidents e segirtad da la Svizra «SUST» vegnan actualmain quatter accidents da bastiments intercurids. En trais dals cas sajan bastiments d’ina societad da navigaziun stads pertutgads che haja problems finanzials. Il cas il pli gravant ha la SUST registrà il 2016 en il Portugal. Ina nav da vitgira ch'è partida dal port Porto è vegnida en ina malaura sin la mar. Dus mariners èn vegnids blessads grevamain.
Dus ulteriurs cas pertutgan la MV Sabina. Tar il bastiment è explodida la maschina principala cura ch'ella vuleva entrar en il port Swinoujscie en la Pologna. Uschia na pudev'ins betg pli manevrar la MV Sagina ed ella è urtada sin fund. Gia l'october è il bastiment urtà sin fund avant la costa dal Danemarc.
Charas garanzias
La flotta d’auta mar svizra datti dapi la Segunda Guerra mundiala. Actualmain custa la flotta il pajataglia 200 milliuns francs, perquai che la Confederaziun stat buna per ils bastiments.
La Confederaziun ha dapi il 1959 concedì garanzias per la navigaziun sin l'auta mar. Quai è vegnì fatg per pudair en cas da crisa garantir il provediment dal pajais. La davosa giada è vegnì dà garanzias il 2008. Quella giada era la Confederaziun da l'avis ch'il ristg saja minimal. En il fratemp è la navigaziun sin l'auta mar sin l'entir mund en ina crisa.
RR novitads 11:00
