Siglir tar il cuntegn
Inhalt

Svizra Suspect: Gigant da cement svizzer haja collavurà cun l'IS

L'interpresa da cement svizra LafargeHolcim haja fatg «sbagls inacceptabels» en connex cun pajaments da protecziun en la Siria. Els sajan sa retratgs memia tard ord da la Siria, ha il president dal cussegl d’administraziun Beat Hess ditg en in'intervista cun la gasetta Le Figaro.

Logo da lafargeHolcim.
Legenda: Il concern svizzer haja sa retratg memia tard or da la Siria. Keystone

Il president dal cussegl d’administraziun Beat Hess ha rapportà ch'il concern da cement LafargeHolcim collavuria cun las autoritads franzosas. En il center da las investigaziuns stettia il suspect, che l'interpresa haja finanzià «plans terroristics». LafargeHolcim haja pajà daners ad extremists sirics per pudair cuntinuar cun las lavurs en in'ovra 150 km en il nord-ost dad Aleppo. Quels daners sajan il 2013 e 2014 ids ad extremists dal Stadi Islamic.

Plinavant stat l'interpresa sut suspect d'avair cumprà ieli dal Stadi Islamic. Quai cuntrafa a l'embargo d'ieli da l'UE cunter la Siria che vala dapi l'atun 2011.

Resultats interns: mesiras inacceptablas

Pervia da quests suspects ha la Frantscha avert ina procedura cunter trais responsabels da la gruppa da cement. Il venderdi èn il manader anteriur Bruno Pescheux, ses successur Frédéric Jolibois ed il manader da segirtad Jean-Claude Veillard vegnids davant dretgira. Per il mument èn els sut cundiziuns libers. Encunter Pescheux ha la procura publica da Paris però inoltrà ina dumonda d'arrest d'inquisiziun.

L'anteriur schef da concern Eric Olsen era entras in'examinaziun interna vegnì a savair, che las mesiras per cuntinuar cun la lavur en l'ovra en la Siria eran inacceptablas ed ha sin quai bandunà l'interpresa la primavaira 2017.

RR novitads 06:00

LafargeHolcim

LafargeHolcim è la pli gronda interpresa da material da construir dal mund. Il 2015 ha la gruppa da cement franzosa Lafarge fusiunà cun il concern svizzer Holcim.