Siglir tar il cuntegn

Header

Navigaziun

Anc adina n'èsi betg cler, co l'iniziativa cunter segundas abitaziuns duai vegnir realisada concretamain.
Legenda: Anc adina n'èsi betg cler, co l'iniziativa cunter segundas abitaziuns duai vegnir realisada concretamain. Keystone/maletg simbolic
cuntegn

Svizra Suspect d'abus da lescha davart segundas abitaziuns en Vallais

En il territori da skis Ovronnaz en il Vallais vegnì suspectà abus da dretg tar duas dumondas da bajegiar. Perquai ha il Tribunal federal approvà in recurs da l’organisaziun «Helvetia nostra». La dretgira ha constatà ch’igl è forsa vegnì empruvà da guntgir la lescha davart las abitaziuns secundaras.

Il Tribunal federal ha approvà dus recurs da l'organisaziun Helvetia nostra. Tar duas dumondas da bajegiar abitaziuns en il territori da skis Ovronnaz en il Vallais datti numnadamain indizis ch'il dretg n'è betg vegnì respectà.

Primas u segundas abitaziuns?

Il Tribunal ha constatà ch'ins vul forsa empruvar da sviar la lescha davart las abitaziuns secundaras. Dus proprietaris avevan dumandà la permissiun per bajegiar 14 respectivamain 40 unitads d'abitar en furma d'emprimas abitaziuns. Concret eran planisads plirs gronds chalets en il terrotori da skis Ovronnaz en il Vallais Sut.

Las passa 40 abitaziuns eran l'emprim planisadas sco abitaziuns secundaras.
Suenter la votaziun avev'ins però autorisà ellas sco emprimas abitaziuns. Las dumondas da bajegiar van ussa enavos a las autoritads vallesanas per valitar ellas da nov.

Cunter las dumondas da bajegiar aveva Helvetia nostra fatg recurs. Lez era dentant vegnì refusà sin l’instanza giudim. Sco l’organisaziun scriva na sa tractia quai a Leytron betg da cas singuls. Ils ultims mais haja quai à plirs tschients dumondas da bajegiar, cunzunt en ils chantuns da Vad e Vallais – malgrà ch’i na dettia betg avunda dumondas per emprimas abitaziuns.

Autoritads vallesanas en critica

A chaschun d’ina cussegliaziun publica avevan ils derschaders pliras giadas crititgà las autoritads vallesanas. Ellas hajan tralaschà lur obligaziun d’examinaziun a moda chastiabla.

Plinavant haja la preinstanza refusà il recurs da la Helvetia nostra cun ina mesa construcziun. Uschia na dettia quai nagina suffizienta e chapibla giustificaziun per la sentenza.

RR novitads 14:00