Siglir tar il cuntegn

Header

cuntegn

Survista Tge mesiras che valan per tgi e cura

Per sbassar las infecziuns ha il Cussegl federal decidì ils 17 da december ulteriuras restricziuns. Cun 2G e 2G+ vul ins evitar lockdowns en Svizra. Ils puncts centrals che valan a partir dals 20 da december fin ils 24 da schaner en survista.

Far cumissiuns: En stizuns vala vinavant sulettamain l'obligatori da purtar mascrina. Plinavant duajan nua che pussaivel vegnir resguardadas las mesiras d'igiena. Uschia per exempel tegnair distanza e lavar ils mauns.

Inscunters privats sco festas da Nadal: Cura ch'ina persuna pli veglia che 16 onns è da la partida che n'è betg virolada u guarida, dastgan be pli sa scuntrar 10 persunas. Uffants ston era vegnir quintads. Èn tuttas persunas sur 16 onns virolads u guarids vala endadens in maximum da 30 persunas. Ordador vala anc adina in maximum da 50 persunas.

Occurrenzas ordadora: Per occurrenzas che han lieu en il liber cun dapli che 300 persunas vala anc adina la regla da 3G.

Homeoffice: Il Cussegl federal ordinescha puspè l’obligatori da homeoffice, quai per reducir ils contacts. Sch'ins sto ir al lieu a lavurar, vala en las localitads nua che dapli ch'ina persuna lavura vinavant l’obligatori da mascrina. Quai independent sche las persunas han in certificat.

Territoris da skis: En pendicularas e telecabinas vala in obligatori da purtar mascrina. Sin runals e sutgeras na vala quel obligatori betg. Ils territoris pon decider in obligatori da mascrina extendì per areals en il liber, uschia per exempel en colonnas avant il med da transport. Access en localitads endadens dad ustarias han be persunas vaccinadas e guaridas cun certificat.

Mesiras en furma illustrada
Legenda: RTR

Ustarias e bars: Entrada en areals endadens dad ustarias e bars è permess be a persunas guaridas u vaccinadas (2G). Vinavant vala en quels lieus in obligatori da mascrina ed in obligatori da seser tar ina consumaziun.

Discotecas e localitads da saut: En discos e localitats nua che vegn sautà è l'access limità sin persunas ch'han in certificat da guariziun u vaccinaziun ed er in certificat da test supplementar (2G+). Ultra da quai han questas localitads da registrar las datas da contact dals giasts. I na vala dentant nagin pbligatori da mascrina u da seser.

Sport: Sco tar tuttas activitads endadens vala er tar il sport la regla da 2G. Pia che be persunas vaccinadas e guaridas pon entrar l'areal interiur da lieus publics. Purtar mascrina resta obligatoric.
Sche purtar mascrina n'è betg pussaivel vala la regla da 2G+. Quai munta che persunas cun in certificat che cumprova ina vaccinaziun u guariziun ston er preschentar in test negativ.

Servetschs divins: En baselgias ed auters lieus cultics èsi obligatoric da purtar mascrina. Tar occurrenzas religiusas a partir da 50 persunas vala l'obligatori da certificat da vaccinaziun u guariziun. Talas occurrenzas cun pli pauc che 50 persunas èn exceptàds da certificats.

Excepziuns da 2G+: Persunas ch'han sa laschà vaccinar cumplainamain, han survegnì la vaccinaziun da rinfrestgament u èn guaridas avant betg pli ditg che quatter mais èn exceptà da l'obligatori da testar.

Tests per certificat puspè gratuits

Avrir la box Serrar la box

Il Cussegl federal ha decidì che tests svelts d'antigen e tests da pool da PCR vegnan puspè pajads da la Confederaziun. Autotests e tests singuls da PCR sco era tests d'anticorpuls na vegnan betg pajads. Tar persunas che han sintoms, che han gì contact cun persunas positivas u persunas ch'eran en in pool positiv, vegnan ils tests vinavant pajads.


Il nov sistem da test vala a partir da sonda, ils 18 da december. A partir dals 17 da schaner 2022 ston ultra da quai tuts che prendan part a tests repetitivs obtegnair in certificat da test.

Vaccinaziun da rinfrestgament: I duai esser pussaivel da sa laschar vaccinar cun il vaccin da rinfrestgament gia 4 mais suenter la segunda vaccinaziun. La recumandaziun uffiziala vegn tenor l'Uffizi da sanadad a vegnir l'autra emna. Tenor Alain Berset haja quai ina impurtanta influenza en il cumbat cunter la varianta omicron.

Obligatori da mascrina sin stgalim secundar II: En Gimnasis ed autras scolas cuntinuantas vala in obligatori da mascrina. Il Cussegl federal recumonda in obligatori da mascrina era en scolas da stgalims pli bass. Blers chantuns han gia introducì quai. Il Cussegl federal recumonda als chantuns era da far vinavant tests repetitivs.

In test tar entrada en Svizra: Davent da glindesdi, ils 20 da december dovran persunas guaridas u vaccinadas be in test negativ per viagiar en Svizra (test da PCR ch'è betg pli vegls che 72 uras u in test svelt d'antigens che n'è betg pli vegls che 24 uras). Tgi che n'è ni vaccinà ni guarì dovra vinavant dus tests negativs, in avant ch'entrar en il pajais ed in 4 enfin 7 dis suenter.

Recumandaziuns concernent ospitals: Il Cussegl federal recumonda als chantuns urgentamain da spustar operaziuns che n'èn betg urgentas. Sche la situaziuns sa pegiurescha ils proxims dis possian ins reagir spert sin questa nova situaziun.

RTR novitads 16:00

Artitgels legids il pli savens