Siglir tar il cuntegn

Svizra Surtut interpresas da construcziun èn periclitadas da concurs

En Svizra èn dapli firmas idas concurs quest onn. Cumpareglià cun l'onn passà han 3% dapli interpresas stuì deponer la bilantscha. Quai resulta da las novas cifras dal servetsch per infurmaziuns d'economia Bisnode.

lavurer en in magasin vid.
Legenda: Il ristg dad ir en concurs è tar interpresas da construcziun bunamain trais giadas pli aut che la media da tut las autras branschas. Keystone

Dal schaner fin il november 2017 han passa 4'200 firmas stuì annunziar l'insolvenza. Il pli savens èn quai stadas firmas da la branscha da construcziun. Là è il ristg d'in concurs stà bunamain trais giadas pli aut che la media da tut las autras branschas. Quai tenor las cifras che l'interpresa da consultaziun Bisnode D&B ha publitgà il venderdi. Tenor questa analisa èn era la gastronomia e manaschis da mastergns periclitads d'ina insolvenza.

Dapli novas firmas

In augment hai però er dà tar las fundaziuns da novas firmas. Quellas èn creschidas per 5% sin passa 39'000 novas firmas. Il pli savens èn vegnidas fundadas firmas en la branscha d'industria da laina e mobiglias.

Damain novas firmas èn vegnidas fundadas en ils chantuns Sursilvania (- 15%), Glaruna (- 14%), Appenzell Dadens (- 12%), Sutsilvania (- 9%), Tessin (- 6%) e Grischun (- 4%). En tut ils auters chantuns è la cifra creschida en cumparegliaziun cun l'onn avant. En egl croda il creschament en il chantuns Zug (+ 17%), Schaffusa (+ 15%) e Basilea-Champagna (+ 13%).

RR novitads 11:00