Uschia hajan ils emetturs da televisiun pers l'onn passà 67 milliuns francs da la svieuta da reclama. Il 2014 è quai stà 45 milliuns francs e per il 2017 quinta la cuminanza d'interess da perder radund 123 milliuns francs.
L'IRF pretenda perquai in'indemnisaziun pli auta da las firmas sco Swisscom e UPC che porschan la pussaivladad da sursiglir reclama da televisiun.
10 raps dapli
La Svizra è l'unic pajais nua ch'ils gestiunaders d'ina rait da cabel e plattafurmas da televisiun pon cumprar per in pretsch regulà ils dretgs d'autur per ils servetschs d'archivar. La tariffa valaivla fin la fin dal 2016 munta ad 1.50 fr. per mais e client sch'ils distribuiders da televisiun possibliteschan da guardar libramain las emissiuns durant 7 dis. Per l'auter onn è previs in auzament da 10 raps per mais e client. L'IRF pretenda perquai da restrenscher u da parzialmain insumma da sclauder la pussaivladad da sursiglir la reclama.
RR novitads 11:00