Siglir tar il cuntegn
cuntegn

Svizra Surpassar velos cun ina distanza d'in meter e mez

L’associaziun pro velo svizra pretenda che automobilists che surpassan velos ston sa tegnair vid ina distanza minimala dad in meter e mez. Per quest intent han ils delegads approvà ina resoluziun correspundenta e surdà ella a las autoritads, scriva pro velo svizra.

Velos sin ina cruschada.
Legenda: Pro velo svizra pretenda ina distanza minimala per pudair surpassar velos. Keystone

Surpassar in velo cun memia pauca distanza saja in problem da segirezza. Plinavant possia quai era tegnair enavos persunas dad ir cun velo. Tar ina retschertga da l'onn 2016 han dapli che dus terzs dals velocipedists inditgà ch'els sa sentian fitg savens surpassads memia datiers.

Blers accidents cun surpassar velos memia datiers

Sco l’Associaziun pro velo svizra scriva, capitia mintga 10avel accident da velo durant ch’el vegnia surpassà d’in auto. En la lescha na stettia betg concret ina distanza per surpassar velos. En plirs pajais sco la Frantscha, la Spagna, il Portugal e la Gronda Britannia dettia quai dentant ina tala lescha, scriva pro velo.

RR novitads 14:00