Siglir tar il cuntegn

Svizra Sur 130'000 suttascripziuns per congedi per babs

Quest suentermezdi vegn l’iniziativa «congedi da paternitad raschunaivel» inoltrada a Berna. Cun charrotschas chaminan ils iniziants tras la citad fin tar la Chasa federala nua che las suttascripziuns vegnan surdadas.

Baps duain avair 20 dis congedi da paternitad - quai pretenda l'initiativa.
Legenda: Baps duain avair 20 dis congedi da paternitad - quai pretenda l'initiativa. Keystone

Ils babs dad oz vulan midar pli savens ils pezs, dar la buttiglia u vesair crescher si ils uffants, di Adrian Wüthrich, il president da l’uniun «Vaterschaftsurlaub jetzt» e Travail.Suisse che ha lantschà l’inizitiva.

Betg l'emprima emprova

En il parlament è il congedi da paternitad vegnì discutà gia diversas giadas, el n'ha dentant mai gì success.

Adrian Wüthrich
Legenda: Adrian Wüthrich cumbatta per il congedi per babs. Keystone
La Svizra è l’unic pajais en Europa che n'ha nagut en la lescha davart il congedi per babs. Quai na dastga betg esser!
Autur: Adrian WüthrichPresident «Vaterschaftsurlaub jetzt» e «Travail.Suisse»

Ils motivs

In dals motivs èn las finanzas. Sch'ils babs survegnan in congedi, lura custa quai. L’uniun fa quint cun custs da 380 milliuns francs ad onn. Tenor Adrian Wüthrich duain quels custs vegnir cumpensads cun l’urden per cumpensar il gudogn (EO), la cassa che finanziescha era il servetsch civil, militar ed il congedi per mammas. Dentant duai quel vegnir augmentà per pudair cumpensar ils custs.

In auter argument cunter in congedi è il fatg che divers contracts collectivs da lavur (GAV) han gia prescrit in congedi per babs. Adrian Wüthrich argumentescha, che quai sajan mo var 50% dals babs che possian profitar da tals contracts. Ils auters 50% n'èn betg suttamess ad in tal contract, e plitost per quels babs cumbatta l’iniziativa, di Wüthrich.

Tge vul l'inizitiva?

Ils 24 da matg aveva l’uniun «Vaterschaftsurlaub jetzt» lantschà l’iniziativa. Las uniuns centralas «Travail.Suisse», «männer.ch», «Alliance F» e «Pro Famiglia Svizra» pretendan cun lur iniziativa 20 dis congedi per babs. Ils 20 dis duain pudair vegnir retratgs da moda flexibla durant l'emprim onn da l’uffant. L’iniziativa vegn sustegnida da dapli che 140 organisaziuns.

RR actualitad 06:00