Sco raschun ha la WEKO inditgà che Sunrise pudess survegnir entras la surpigliada in monopol sin differents martgads. Qua ha la WEKO per exempel numnà la sparta da transmissiun dad occurenzas da sport sin pay-tv. En auters secturs dettia indizis ch'i pudess dar in monopol collectiv ensemen cun il concurrent Swisscom. Qua pudessan esser pertutgads ils martgads per l'internet svelt e per la telefonia sin la rait fixa.
Sunrise è optimistic
Sunrise sez è optimistic che tut gartegia, han els declerà en ina communicaziun. Ins giaja da quai ora ch'in survegnia il consentiment da la WEKO. Cun surpigliar UPC dettia numnadamain ina concurrenza pli intensiva sin il martgà da telecommunicaziun. Ins spetgia che la transacziun possia vegnir fatga en l'ultim quartal da l'onn.
Pretsch da 6,3 milliardas
La surpiglia era vegnida annunziada il favrer. Il concern svizzer aveva fixà cun la «mamma» da UPS – Liberty Global – in pretsch da 6,3 milliardas francs. Per pudair finanziar la cumpra dovra Sunrise dentant novs meds finanzials. Concret duai dar ina squitta da chapital da 4,1 milliardas francs. Davart quest auzament dal chapital vegn decidì l'atun ad ina radunanza extraordinaria.
RR novitads 09:00