Suicidi assistì: Maioritad vul infurmaziuns concretas dal medi

Persunas da la Svizra tudestga spetgan che lur medi cusseglia ellas a la fin da lur vita neutral ed objectiv davart tut las opziuns. Quai ha demussà in studi represchentativ che l'organisaziun per assistenza al sucidi «Exit» ha laschà far.

La gronda part dals Svizzers tudestgs e dal Tessin giavischian da vegnir sustegnids dals medis sch'els sa decidan per «l'assistenza al suicidi». Il studi represchentativ che l'organisaziun «Exit» ha laschà far duai procurar ch'els vegnian meglier en discurs cun ils medis. L'organisaziun pretenda era che l'assistenza al suicidi duai daventar ina «activitad medicinala voluntaria».

Infurmaziuns neutralas èn dumandadas

Malgrà che passa la mesadad dals dumandads na vulessan betg udir da lur medi tge che spetga els a la fin da lur vita, vulan passa trais quarts savair tge dretgs autonoms ch'els han. Sche la mort saja prevesibla, giavischia ina gronda part dals dumandads ina tgira stretga entras il medi.

La studia saja fitg clera, di Albert Wettstein, il medi da la citad da Turitg. I vegnia pretendì infurmaziuns detagliadas e neutralas davart tuttas opziuns ch'èn avant maun a la fin da la vita. I saja l'emprima retschertga tar il tema «fin da la vita» ed «assistenza al suicidi» che n'ha betg dumandà ils medis, mabain ils burgais.

RR novitads 14:00

La retschertga

Per la retschertga represchentativa èn vegnidas dumandadas 1’036 persunas da la Svizra tudestga sur 50 onns. La marscha da sbagl maximala dals resultats munta a +/-3,1%. Fatg l’enquista online ha l’institut da perscrutaziun Link.