Suenter la lavina ier suentermezdi a Crans-Montana è la persuna grevamain blessada morta vid las blessuras. I sa tractia d'in lavurer da pista franzos da 34 onns. Quai communitgescha la polizia chantunala dal Vallais. Ier saira è l'um vegnì salvà en in stan critic ord la lavina. Ulteriuras 3 persunas han ins chattà levamain blessadas. Questa damaun han ins smess la tschertga suenter che las forzas da salvament n'han chattà naginas ulteriuras persunas durant la notg. Ier suentermezdi aveva ina lavina sutterrà radund 400 meters d'ina pista marcada en la regiun da Plaine Morte. La procura publica ha instradà in'inquisiziun.
RR novitads 09:00