La pli auta temperatura dapi che las mesiraziuns han cumenzà, han ins mesirà cun 35,7 grads a Sevelen en la Vallada dal Rain da Son Gagl. A Cuira ha il termometer mussà 34,9 grads. E temperaturas enturn u sur 34 grads hai era dà en ils chantuns Uri e Vallais.
La saira e la notg hai lura dà ferms urizis e quels han purtà en divers lieus granella e suffels da stemprà massivs. A Langnau en l'Emmental, a Schüpfheim LU sco era a Sion ed Engelberg ha il vent buffà tenor SRF Meteo cun dapli che 90 kilometers l'ura. Plievgia ferma hai dà a Kandersteg BE e Giswil OW. En curt temp èn crudads 20 millimeters plievgia.
Malauras han era gì consequenzas per il traffic
In culp d'in chametg ha bloccà il tren tranter Belp e Seftigen en il chantun Berna. La lingia Lucerna-Interlaken Ost è stada interrutta pervi d'ina planta derschida. A Derborence en il chantun Vallais èn trais autos vegnids cuvrids d'ina bova, blessads hai dà nagins.
RR novitads 06:00