Siglir tar il cuntegn
Inhalt

Svizra Successiun Uvestg Huonder – Vatican na vul betg mesas chaussas

Nunzi Thomas Gullickson, il mess dal papa a Berna, na vul nagina soluziun intermediara per l’uvestgieu da Cuira: El refusa da nominar in administratur e vul preschentar al chapitel catedral ina glista da trais nums per la successiun Huonder.

Papa sin balcun.
Legenda: Papa Francestg salida als 5 da favrer ils crettaivels sin la plazza Son Peder en la cità dal Vatican. Keystone

Cun quai che l’uvestg Vitus Huonder vegn ils 21 avrigl 75 onns ha el dad offrir al papa sia desditga. Questa giada pretenda dentant l’allianza critica «Es reicht!» dal Vatican da spetgar cun eleger in uvestg e nominar in administratur, che duai l’emprim quietar las undas en l’uvestgieu da Cuira.

Els cun in placat per in nov cumenzament.
Legenda: Represchentantas e represchentants da l’allianza «Es reicht!» tar in acziun a Cuira il november passà. Keystone

Allianza «Es reicht!» ha inscuntrà il nunzi papal Thomas Gullickson

Questa pretaisa steva en il center dad ina petiziun, che l’allianza aveva surdà ensemen cun 2’600 suttascripziuns al cumenzament da l’emna a Berna al mess papal Gullickson.

Durant quel inscunter haja gì lieu in discurs da radund duas uras, en il qual che Thomas Gullickson haja fatg cler, ch’el na veglia nagina administratur per l’uvestgieu da Cuira. Quai ha communitgà l’allianza la mesemna.

Glista da trais per eleger il nov uvestg da Cuira

Gullickson veglia preschentar al gremi electoral, al chapitel catedral, ina glista da trais candidats. Da quella sappian ils 24 commembers dal chapitel catedral lura eleger. Questa procedura per l’uvestgieu da Cuira sa basa sin il decret papal «Etsi salva» da l’onn 1948.

El predgia.
Legenda: Uvestg Vitus Huonder durant ina messa en la claustra da Melchtal il zercladur 2016. Keystone

L’allianza ha communitgà en pli, ch’il team da coordinaziun, che ha visità Gullickson, saja stà «vairamain spaventà» da la vista da Gullickson sin la baselgia Svizra. Il nunzi haja discurrì dad ina «famiglia disfuncziunala». En pli ha il team l’impressiun, ch’il nunzi «prendia bler memia pauc seriusa la situaziun desolata en l’uvestgieu da Cuira».

RR novitads 14:00