La liberaldemocrata da 56 onns propona che la PLD tessinaisa nomineschia in um ed ina dunna per la cursa interna. Veglia la direcziun da la partida dentant mo ina candidatura, lura duai quai esser il schef da fracziun da la PLD, Ignazio Cassis, uschia Laura Sadis vinavant.
Laura Sadis è dapi il 2007 en il Cussegl naziunal. Fin il 2015 è ella stada commembra da la regenza tessinaisa. Dapi il 2015 è l'experta da taglia er en il cussegl d'administraziun da la Alp Transit Gottard SA e da l'assicuranza Mobiliar.
Sper Laura Sadis ed Ignazio Cassis vegn era anc Chirstian Vitta numnà sco pussaivel candidat. Christian Vitta è dapi 2015 directur d'economia e da finanzas dal chantun Tessin. Plinavant è el vicepresident da la PLD Svizra, commember dal cussegl da banca da la Banca naziunala svizra e president da la conferenza da las regenzas dals chantuns alpins. Cun be 44 onns è el il pli giuven dals trais candidats pussaivels.
Anc nagins candidats uffizials
Las secziuns chantunalas da la PLD han anc temp fin ils 11 d'avust da far propostas per la successiun da Cusseglier federal Didier Burkhalter. La fracziun vul decider il prim da settember davart la candidatura uffiziala. L'elecziun dal nov cusseglier federal u da la nova cussegliera federala è lura ils 20 da settember.
RR novitads 08:00