Siglir tar il cuntegn

Header

cuntegn

Svizra Successiun Burkhalter – Martin Schmid tranter ils candidats

Per ils parlamentaris grischuns fiss Martin Schmid in candidat capabel. Els spetgan dentant ch’in italofon u francofon giaja cun la plima.

Cun la demissiun dal Cusseglier federal Didier Burkhalter gira era gia il carussel da pussaivels candidats. Quai era cun in Grischun.

Martin Schmid
Legenda: CS Martin Schmid (pld/GR) Keystone

Adina puspè menziunà vegn il cusseglier dals chantuns liberaldemocrat Martin Schmid.

Dal Grischun...

El fiss segir capabels ed ina persunalitad che pudess reussir en in gremi pretensius sco la regenza federala, di ses collega d’uffizi, il cristiandemocrat Stefan Engler. Mo la dumonda saja quant grond ch’il squitsch è sin la partida liberaldemocratica da purtar in candidat da la Svizra franzosa ni italofona. U sch’i dettia er ina schanza per in candidat d’in autra regiun da la Svizra. E la fin finala stoppian ins er discutar sch’il sez dals liberaldemocrats è garantì u sch’i dettia era autras partidas che pretendian d’avair in sez en il Cussegl federal. Mo anc saja bler speculaziun.

Ignazio Cassis
Legenda: CN Ignazio Cassis (pld/TI) Keystone

Era per il cristiandemocrat Martin Candinas fiss il cusseglier dals chantuns grischun Martin Schmid in valabel candidat. El vegli dentant buc specular memia fitg mabain laschar quai gieu a la partida liberala. Sco Grischun haja el dentant adina plaschair sche Grischuns possian surpigliar novas sfidas.

...u da la Svizra latina...

Che Martin Schmid fiss in candidat capabel crai er Duri Campel da la PBD. Dentant, per el èsi cler ch’il successur u la successura da Cusseglier federal Didier Burkhalter stoppia vegnir da la Svizra latina. La dumonda saja dentant sche quai saja la Svizra franzosa ni il Tessin. Dapi la demissiun da Flavio Cotti il 1999 n’hai dà nagin Cusseglier federal italofon pli. Sche quai duai restar uschia stoppia uss decider la PLD.

Christian Lüscher
Legenda: CN Christian Lüscher (pld/GE) Keystone

Dal Tessin è il cusseglier naziunal e schef da fracziun Ignazio Cassis ses favurit. En Svizra franzosa l’anteriur cuntracandidat da Didier Burkhalter, il cusseglier naziunal genevrin Christian Lüscher u sia collega dal Vad, Isabelle Moret.

Era pussaivel saja tenor el, ch'anc auters Cussegliers federals pudessan annunziar lur demissiun. Il temps avant las vacanzas da stad saja predestinà per talas annunzias, di Campell.

...u ina dunna?

Isabelle Moret
Legenda: CN Isabelle Moret (pld/VD) Keystone

Per la socialdemocrata Silva Semadeni n’èsi dentant betg segir ch’il sez resta en la Svizra latina. Ina candidata pussaivla fiss era la cussegliera dals chantuns Karin Keller-Sutter da Son Gagl. Dapi la demissiun d'Elisabeth Kopp il 1989 n'han ils liberal democrats betg pli gì ina dunna en la regenza federala.

Elecziun il settember

Succeda in um u ina dunna a Didier Burkhalter? Ina persuna da la Svizra franzosa u dal Tessin ni forsa tuttina in dal Grischun? Il carussel da candidatas e candidats gira. Tgi che dastga prender plaz en il Cussegl federal decida l’Assamblea federala la mesemna ils 20 da settember 2017.

Karin Keller-Sutter
Legenda: CS Karin Keller-Sutter (pld/SG) Keystone
audio
Bunura: Tgi succeda Didier Burkhalter?
ord Actualitad dals 15.06.2017.
laschar ir. Durada: 2 minutas 45 Secundas.

RR actualitad 07:10

Artitgels legids il pli savens