Siglir tar il cuntegn
Inhalt

Svizra Successiun Burkhalter – Christian Vitta avess interess

Il cusseglier guvernativ Christian Vitta dal Tessin (PLD) stess a disposiziun sco candidat per la successiun da Didier Burkhalter.

Christian Vitta.
Legenda: Cusseglier guvernativ Christian Vitta a chaschun dal di da partida PLD ils 13.09.2015 a Mendriso. Keystone

En il Tessin è in ulteriur candidat da la Partida liberaldemocratica svizra PLD sa mess en posiziun per la successiun dal cusseglier federal Didier Burkhalter. Il cusseglier guvernativ Christian Vitta stettia a disposiziun sco candidat. Quai ha ditg l’econom da 44 onns en in’ intervista cun la gasetta «Blick».

Christian Vitta fiss pront

El represchentia in'autra generaziun da politica. Quai che possia esser in avantatg, dentant era in dischavantatg. Ed el haja experientscha en l'executiva: Vitta è stà 15 onns president communal e dapi dus onns è el ussa cusseglier guvernativ. Sia decissiun dependia dentant da la decisiun da sia partida. La PCD vegn a decider quants candidats ch'els vegnan a nominar. Sch'i saja be in candidat, lura haja Ignazio Cassis segir las meglras cartas. Sche la PLD dal Tessin vegn a nominar plirs candidats, lura vesia la chaussa ora tut auter.

Las meglras schanzas da vegnir nominà da la PLD dal Tessin ha probabel vinavant il cusseglier naziunal e schef da fracziun Ignazio Cassis.

L’Assamblea federala decida ils 20 da settember 2017 tgi che succeda a Didier Burkhalter.

RR novitads 06:00