Strategia d'energia 2050 è pronta per votaziun finala

Naginas ovras atomaras novas, dapli energias regenerablas ed in consum d'energia pli pitschen: Quai èn las pitgas da la nova strategia d'energia. Il parlament ha reglà l'emprim pachet da mesiras persuenter. La debatta cuntinuescha però.

In um sin in tetg porta in panel da solar.

Legenda da maletgs: Las mesiras per la strategia d'energia 2050 èn sut tetg. Keystone

Il glindesdi ha il Cussegl dals chantuns sclerì las ultimas differenzas, uschia che la fatschenta è pronta per la votaziun finala. Che quella vegn a far naufragi na vegn betg spetgà, er sche la PPS ed ina maioritad da la PLD refusan la fatschenta.

Votaziun november: «Per ina sortida reglada da l’energia atomara»

Avert resta però sch'il suveran vegn la finala a decider en chaussa. Adversaris considereschan numnadamain da far in referendum. Ina votaziuns pudess il pli baud avair lieu ils 21 da matg 2017.

Gia avant ina votaziun cumenzan en il parlament probablamain las consultaziuns per la secund’etappa, l’uschenumnà «Sistem per manar il clima e l’energia» (KELS). Ultra da quai vegn il pievel a decider il november davart l’iniziativa «Per ina sortida reglada da l’energia atomara».

Fukushima sco impuls

L’impuls per l’iniziativa e la strategia d’energia è stada la catastrofa atomara da Fukushima, ils 11 da mars 2011. Dus mais suenter la disgrazia aveva il Cussegl federal decis da betg bajegiar novas ovras atomaras en Svizra.

Anc il medem onn aveva il Parlament confermà questa decisiun da princip. En consequenza aveva il Cussegl federal elavurà la «Strategia d’energia 2050».

RR novitads 16:00