Siglir tar il cuntegn
cuntegn

Svizra Strassburg: Svizra ha cuntrafatg a la convenziun per dretgs umans

La Svizra na dastga betg repatriar in Sudanais, ch’è dapi ses temp da scola activ politicamain. Quai ha decis il tribunal europeic per ils dretgs umans a Strassburg.

Il fabricat dal tribunal en totala.
Legenda: Il tribunal per dretgs umans a Strassburg ha s'occupà cun la Svizra. Keystone

Cun decider da repatriar l’um haja la Svizra cuntrafatg a la convenziun per ils dretgs umans, che prevesa il dretg sin vita ed il scumond da tortura.

Um saja en privel da vita en il Sudan

Cun quai che l’um è activ per in moviment dad opposiziun sudanais, saja da quintar cun privel da vita per el, sch’el vegn tramess enavos en sia patria. Las autoritads sudanaisas hajan probablamain gia in mira l’um da 33 onns.

I saja enconuschent, che la regenza sudanaisa surveglieschia las activitads da gruppas opposiziunalas en l’ester, scriva il tribunal en sia decisiun publitgada il mardi.

Activitads per gruppa da rebels sudanaisa

En il Sudan aveva l’um rimnà raps per ina da las gruppas da rebels las pli impurtantas en il Sudan. Cura che sias persunas da contact eran vegnidas arrestadas era er el rivà en la mira da las autoritads.

Perquai è el fugì dal 2009 ed ha dumandà asil en Svizra. L’onn 2014 ha il secretariat statal per migraziun refusà la dumonda. Ses recurs è vegnì refusà dal Tribunal federal .

Argumentaziun specifica per quest cas, betg per tuts

En in segund cas d’in ulteriur um dal Sudan ha il Tribunal federal decis en favur da la Confederaziun. Strassburg era da l’avis, che las activitads politicas da l’um pertutgà na mettian el betg en privel da vita, sch’el haja da turnar en il Sudan.

Tenor la statistica da las autoritads svizras sa chattavan la fin d’avrigl 291 persunas dal Sudan en in process per survegnir asil en Svizra. A 116 dad ellas è vegnì dat albiert per il mument, tar quatter è vegnida interrutta la procedura.

RR novitads 10:00