Siglir tar il cuntegn
cuntegn

Svizra Stoppar turissem da cumpra cun taglia sin plivalur

Quels che han la pussaivladad nizzegian savens er ella: Ir a cumprar en sur cunfin. Actualmain èsi pussaivel da cumprar en per fin a 300 francs senza pajar la taxa sin plivalur. Ina moziun vul sbassar quella taglia sin be pli 50 francs.

Controlla dad auto sin cunfin.
Legenda: Ils pretschs bass, il ferm franc svizzer e las uras d'avertura attractivas attiran a blers svizzers da cumprar en sur cunfin. Keystone

Cun sia moziun vul Werner Hösli (GL/PPS) reducir il turissem da cumpra e rinforzar ils affars svizzers. Quai duai esser pussaivel cun sbassar l’import liber per las cumpras sur cunfin da 300 sin be pli 50 francs. Il cusseglier dals chantuns da Glaruna è persvadì, ch'in per tschient milliuns francs pudessan vegnir uschia da bun a la cassa da la Confederaziun.

«Garanto»: Tschintg giadas dapli lavur als cunfins

Heidi Rebsamen dal sindicat da dazi e dal persunal da las guardias da cunfin «Garanto» percunter n'è insumma betg persvadida da la moziun. Tenor ella fiss la consequenza ch'i dess tschintg giadas dapli lavur als cunfin. Concret: Bler dapli controllas als cunfins, bler dapli decleraziuns da cumpras, colonnas dad autos pli lungas ed i vuless dapli infrastructura.

Uss è la cumissiun londervi

Il Cussegl dals chantuns ha decis da dar la moziun en la cumissiun. Quella duai elavurar ina soluziun che vegn lura suttamessa al parlament. Il Cussegl federal dentant cusseglia in «na» a la moziun.

Tenor el na possia il turissem da cumpra betg vegnir reducì cun quellas mesiras. I sajan auters motivs che attiran ils Svizzers sur cunfin per cumprar en – numnadamain las uras d’avertura attractivas da las butias, il ferm franc svizzer u las differenzas da pretschs.

RR actualitad 08:00