Il pretsch per ieli da stgaudar e per benzin dependa da plirs facturs, tranter auter da l'economia mundiala. E quella na possian els betg influenzar, di Ueli Bamert da l'associaziun che represchenta ils interess dals importaders da carburants fossils (Avenergy Suisse). Vitiers vegnan anc ils custs per il transport e per il deposit, custs d'aliments per l'infrastructura, pajas e taxas statalas - tar l'ieli da stgaudar è quai la taxa da CO2 e tar il benzin la taxa sin petroli.
Corona e la guerra han influenza
La raschun ch'il pretsch per ieli da stgaudar e per benzin è creschì talamain quest onn, ha tranter auter in connex cun la crisa da corona: Betg mo l'economia mundiala è creschida suenter dus onns pandemia, mabain er la dumonda suenter ieli. Plinavant ha la guerra en l'Ucraina per consequenza ch'ils pretschs èn creschids en general – betg mo per l'ieli, mabain era per il gas.
Grev da far prognosas per pretsch da benzin
I saja grev da far prognosas co ch'ils pretschs vegnian a sa sviluppar ils proxims mais, di Ueli Bamert. Cunzunt tar il benzin dettia grondas fluctuaziuns. Uschia na possian els era betg dir, daco exact ch'il pretsch da benzin saja sa sminuì in pau las davosas emnas.
La dumonda suenter ieli vegn a s'augmentar
Tar l'ieli da stgaudar po «Avenergy Suisse» dir in zichel dapli: L'enviern vegni la dumonda suenter ieli ad esser gronda - er pervi da la mancanza da gas, cunquai che interpresas che han fin ussa producì cun gas ston midar sin ieli. Uschia vegnia la dumonda suenter ieli a crescher ed er il pretsch per ieli da stgaudar vegnia a s'augmentar, declera Ueli Bamert.
Ils vendiders pudessan avair tantas empustaziuns ch'els na pon betg pli suenter. Perquai cussegliain nus dad uss emplenir il tanc dad ieli.
Cun in tanc plain na stoppian ils consuments e las consumentas era betg far quitads che l'ieli na tanschia betg per l'entir enviern. Impurtant saja dentant da menziunar ch'i haja adina avunda ieli, benzin ed diesel en Svizra. Era sche la dumonda vegnia a crescher, na stoppian ins betg temair ch'i na dettia betg avunda da quels carburants in di pli.
