Siglir tar il cuntegn

Header

Cusseglier federal Alain Berset e cussegliera naziunala Isabelle Moret
Legenda: Suenter la debatta davart las rentas, cusseglier federal Alain Berset dat adia a cussegliera naziunala Isabelle Moret. Keystone
cuntegn

Svizra Stgars gea dal Cussegl naziunal a la refurma da las rentas

Il Cussegl naziunal ha finì la debatta davart la prevenziun per la vegliadetgna. Ed en la votaziun finala hai dà ina leva maioritad en favur da la fatschenta.

Approvà il sboz per la prevenziun per la vegliadetgna han la PPS, la PLD ed ils verd-liberals. Refusà el han la PS ed ils verds, la PCD è s'abstegnida da la vusch.

La refurma prevesa tranter auter ch'era las dunnas ston lavurar fin 65 onns, damain rentas per vaivas e contribuziuns pli autas a las cassas da pensiun. Il sboz va ussa enavos en il Cussegl dals chantuns, i dat anc pliras differenzas tranter las duas chombras.

Vinavant duas tariffas da contribuziun a l’AVS

Avant la votaziun finala ha il Cussegl naziunal anc prendì ina decisiun en favur da las persunas cun activitad da gudogn independenta, quellas na ston betg pajar dapli renta d’AVS. Il Cussegl federal e la cumissiun predeliberanta avevan proponì d’auzar la tariffa da contribuziun sin 8,4%.

Il Cussegl naziunal vul dentant restar tar 7,8%. Arguments en il Cussegl naziunal èn stads che talas persunas sajan las pitgas da la societad, e bleras interpraisas pitschnas pudessan vegnir en miserias finanzialas cun in tal augment.

RR novitads 11:00