L'aura burascuas cun plievgia e naiv han fatschentà polizia e pumpiers a Berna e Lucerna. En plirs lieus hai dà interrupziuns dal current electric e bovas sur vias. Ad Emmen (LU) èn pliras vias stadas serradas pervia dad aua gronda.
En il chantun Lucerna èn radund 7000 chasadas stadas pertutgadas da l'interrupziun da l'electric, communitgeschan las Ovras electricas da la Svizra centrala. Naiv e vents ferms hajan interrut pliras lingias. Ils lavurers lavurian intensiv vida schliaziuns.
LU: Vias bloccadas tras bovas ed aua gronda
En l'Entlebuch è ida a val ina bova che blocchescha tenor la polizia da Lucerna ina via da colliaziun. Persunas na sajan betg vegnidas blessadas. Era qua n'era anc betg cler, quant ditg che la via resta serrada. Pliras bovas pli pitschnas haja quai era dà, senza però bloccar vias. Questas sajan però per part scheladas.
Aua gronda aveva quai dà ad Emmen. La via principala è stada serrada temporarmain. Ussa è'la però puspè averta, communitgescha la polizia. Serrada resta però ina via laterala.
BE: 80 annunzias da malaura
Era en il chantun Berna hai dà interrupziuns dal current electric. Plirs tschancuns da vias chantunalas sajan serrads - per part pervi da privel da lavinas.
Gia ier aveva la malaura fatschentà polizias e pumpiers en plirs chantuns.
RR novitads 09:00