Siglir tar il cuntegn
cuntegn

Svizra Stemprà «Egon» porta anc dapli naiv

Il return da l’enviern ha procurà en blers lieus per situaziuns precaras sin las vias svizras.

«Egon» procura en blers lieus per situaziuns precaras sin las vias svizras.
Legenda: «Egon» procura en blers lieus per situaziuns precaras sin las vias svizras. Keystone

Almain duas persunas sajan mortas dad accidents cun l’auto, pliras persunas sajan vegnidas blessadas. Plinavant haja dà plirs tozzels accidents cun donn da material. Quai scriva la polizia.

Carambolascha en massa en il chanzun Lucerna

Ina carambolascha en massa hai dà tar la sortida dal Eich tunnel en il chantun Lucerna. Cura che la circulaziun en colonna è stagnada è succedì in accident nua che diesch autos ed in auto da furniziun eran cumpegliads. Tar l’accident èn set persunas vegnidas blessadas levamain. Ellas èn vegnids transportadas cun ambulanzas en ils spitals dal conturn. Tuttas persunas han dentant pudì bandunar il spital a mezdi.

Enturn mezdi hai cumenzà a Lucerna a cuflar fermamain. Perquai eran las vias enfra curt temp cuvertas cun glatsch.

Gronda fortuna han uffants da scola gì en il chantun Neuschatel. Cura ch’els èn turnads da lur champ da skis è lur bus sa lischnà datiers Vissoie (chantun Vallais) ed è sa disgrazià. Nagin dals 55 uffants e dals otg accumpagnaders èn vegnids blessads.

Per questa naiv nova en il nord da las Alps è il stemprà Egon responsabel. Il vent ha buffà cun ina spertadad da fin 150 kilometers ad ura.

RR actualitad 06:00