Siglir tar il cuntegn
cuntegn

Svizra Stefan Engler persvada cussegl dals chantuns cun plurilinguitad

Il cusseglier dals chantuns Stefan Engler vul ina cumissiun federala per dumondas da lingua. Il Cussegl dals chantuns ha approvà la moziun dad Engler, ussa sto dentant anc il cussegl naziunal vegnir persvas.

Legenda: Tadlar il audio Cussegl dals chantuns di GEA a moziun da Stefan Engler per cumissiun da linguas . Durada 02:48 minutas.
02:48 min, Actualitad dals 31.05.2017.

Ina vusch ha decis sur da la moziun da Stefan Engler. Cun 17 encunter 16 vuschs e 5 abstenziuns ha il Cussegl dals chantuns ditg gea ad ina cumissiun federala che duai cussegliar en dumondas da lingua. Stefan Engler è cuntent cun il resultat. Perquai ch'il cussegl federal è cunter sia moziun n'era quai insumma betg cler, ch'i dettia in gea da la chombra pitschna.

Jau manegel ch'il Cussegl dals chantuns è pli sensibel per dumondas da lingua ch'il Cussegl naziunal. Quai ha da far cun la cumposiziun. Il Cussegl naziunal vegn plitost a far ils quints...
Autur: Stefan EnglerCusseglier dals chantuns PCD / GR

Dentant è er Stefan Engler conscient, che la moziun ha pir surmuntà l'emprim obstachel. La dira nusch saja lura da persvader il Cussegl naziunal.

Per persvader la chombra gronda spera Stefan Engler sin il sustegn dals romands e dals italofons en il Cussegl naziunal. Ed era ch'in ni l’auter collega da lingua tudestga vegn a gidar da persvader ils cussegliers naziunals. Cura che la moziun vegn trattada en la chombra gronda na es anc betg decis.

Lingua gea - cumissiun na

Ina funcziun da la cumissiun federala da linguas duess esser da cussegliar la Confederaziun en dumondas da lingua. Il Cussegl federal na vul dentant betg ina tala cumissiun. Ina cumissiun dapli custa era dapli, è l'argument.

Per Stefan Engler è quai in argument debel. Tenor el dettia la Confederaziun ora raps per tut autras cumissiuns che fetschian pli pauc senn. La dumonda da lingua saja ina da las pli impurtantas per la Svizra e per quella dumonda valia era la paina da dar ora raps, di Engler vinavant.

Era sch'il Cussegl federal na sustegna betg la moziun da Stefan Engler, na vul quai betg dir, che las linguas n'èn betg impurtantas per la Confederaziun. Il minister da cultura, Alain Berset, manegia che la Confederaziun haja experts en il departament. Sch'i dettia dumondas specificas, sche lura giajan els per cussegls d'experts, uschia argumentescha il cusseglier federal Alain Berset la decisiun dal Cussegl federal.

RR novitads 14:00

Tge vul Stefan Engler

Stefan Engler vul rinforzar la politica da linguas sin livel federal cun ina cumissiun. Far part da la cumissiun per dumondas linguisticas duain mintgamai trais represchentants da las quatter linguas naziunalas (tudestg, franzos, talian e rumantsch) sco era trais represchentants d’autras linguas discurridas en Svizra (p.ex. portugais u englais).