Siglir tar il cuntegn

Svizra Spot da la SSR è concurrenza illoiala

Il Tribunal federal ha confermà ina sentenzia cunter la SRG SSR en connex cun in spot da reclama. En il spot aveva la SSR cumpareglià las tariffas da radio e da televisiun cun custs d'abunament per gasettas. Sinaquai aveva il concern da medias Tamedia rinfatschà a la SSR concurrenza illoiala.

guardar televisiun
Legenda: Messadi principal dal spot da reclama: guardar mintga di televisiun è pli bunmartgà che leger mintga di la gasetta. Dreamstime

La dretgira commerziala da Turitg aveva dà raschun a la Tamedia, la SSR n’ha dentant betg acceptà questa sentenzia e tratg vinavant quella.

Il messadi principal dal spot da reclama dispitaivel è ch’ils custs per guardar mintga di televisiun sajan pli bass che quels per leger la gasetta mintga di. Latiers vegnan numnads tranter auters ils pretschs per in abunament annual dal «Tages-Anzeiger» e da la «SonntagsZeitung».

Cumpareglià chaussas ch'ins na po cumparegliar

Tenor il Tribunal federal haja la SSR cumpareglià chaussas ch'ins na possia betg vairamain cumparegliar. Cumparegliaziuns da pretschs èn tenor lescha be permess tar medema quantitad e qualitad.

Tamedia cuntenta ch'il cas è serrà giu

La SSR sto pajar ils custs da dretgira da 5000 francs e plinavant pajar 6000 francs indemnisaziun a Tamedia. La SSR prenda enconuschientscha da la sentenzia, sco ch’ella scriva en ina posiziun. La Tamedia saja cuntenta ch’il cas saja serrà giu, uschia il pledader da l’interpresa.

RR novitads 15:00