Siglir tar il cuntegn
Inhalt

Svizra Spiuns tircs en Svizra – Cassis vul tschertgar il dialog

Il Cusseglier federal e minister da l’exteriur Ignazio Cassis ha oz prendì posiziun tar l’affera da spiunascha tranter la Svizra e la Tirchia. El vul schliar il cas sin via diplomatica.

Il cas vul Ignazio Cassis schliar sin via diplomatica.
Legenda: Il cas vul Ignazio Cassis schliar sin via diplomatica. Keystone

En connex cun las afferas da spiunascha vul il cusseglier federal Ignazio Cassis agir a moda diplomatica. Perquai vul el tschertgar il dialog cun la Tirchia e na vul betg ch'i dettia ina situaziun sco tar l’affera da spiunascha tranter la Gronda Britannia e la Russia, nua che diplomats han stuì bandunar ils pajais.

Viadi en Tirchia malsegir

Il viadi en Tirchia, che Cassis aveva planisà pervia da la situaziun umanitara en la Siria, na vuleva el dentant betg confermar. El veglia decider en ils proxims dis. Las afferas da spiunascha hajan dà motiv ad el da reponderar il viadi. I saja cler che la Svizra na possia betg tolerar spiunascha e rapinament sin ses territori.

Cas anc en examinaziun

Renfatschà vegn che spiuns tircs hajan la stad 2016 planisà da rapinar in commerziant cun ragischs svizras e tircas. Quai perquai che l'um saja in aderent dal moviment Gülen, che vala en Tirchia sco in’organisaziun terroristica.

L’ambassada Tirchia refusa il suspect. per il mument examinescha la Procura publica federala il cas dals spiuns tircs.

RR novitads 18:00