Siglir tar il cuntegn
cuntegn

Svizra «Spend-O-Mat» – il nov tschep d'unfrir – cun carta da credit

En Svezia, Norvegia e Germania èn ils automats gia pulit derasads. En la Baselgia averta Elisabeth a Basilea datti dapi bun in mais l'emprim automat per unfrir cun carta da la Svizra.

L'automat ch'ils da Basilea han mess en baselgia pudess er laschar ora chips, tickets da parcar u bigliets da tren, uschia il mainaproject da la baselgia Elisabeth, Beat Müller. Els hajan però simplamain la funcziun da far pajaments cun carta da banca u da credit e retschaiver persuenter ina quittanza.

L'automat è ina versiun adattada spezialmain per unfrendas a la baselgia. La quittanza pon ins dal reminent er duvrar per trair giu l'unfrenda da la taglia.

Reacziuns da fotografar fin ignorar

Las reacziuns sin la nova purschida sajan fitg differentas, di Beat Müller. Tscherta glieud ignoreschia l'automat malgrà ch'el saja grond e plazzà fitg prominentamain.

Blers fetschian fotografias u sajan simplamain surstadas da vesair in automat en baselgia. I haja natiralmain er da in u l'auter ch'è da l'avis ch'il «Spend-O-Mat» na tutgia betg en baselgia.

Nagut per la baselgia dal vitg

Beat Müller è da l'avis, che l'automat d'unfrir saja almain il mument plitost insatge per baselgias grondas cun blers cartents e turists. Tar els a Basilea vesa Müller l'avantatg, ch'els na ston tut tenor betg pli midar tanta munaida e bancnotas estras or dals tscheps d'unfrenda.

Tut en tut saja l'automat però ina pulita investiziun: Quai cun chattar u bajegiar ina mobiglia adattada per la baselgia, chattar ina banca che pussibiliteschia insumma ils pajaments cun carta per la baselgia ed er ils custs da l'automat sez.

Anc nagin tema en il Grischun

Pliras plaivs e baselgias grischunas han ditg sin dumonda dad RTR, che la varianta d'unfrir cun carta na saja anc betg en discussiun.

Uschia è il «Spend-O-Mat» er per la decana da la Baselgia refurmada grischuna, Cornelia Camichel-Bromeis, tut insatge nov. Ella pudess però s'imaginar in tal automat tar baselgias grondas cun blers turists u per collectas pli grondas en favur da renovaziuns u projects specials.

RR actualitad 17:20