Siglir tar il cuntegn

Svizra Sommaruga defenda la pratica d'asil

La presidenta dal Cussegl federal Simonetta Sommaruga defenda la pratica d'asil tar requirents ord l'Eritrea. I saja impussibel che la Svizra tramettia enavos requirents d'asil en in pajais totalmain arbitrar ha ditg Sommaruga a Berna.

Simonetta Sommaruga
Legenda: Simonetta Sommaruga durant ses pled avant ils schurnalists. Keystone

I dettia blers rapports differents davart l'Eritrea, dentant sajan tuts da l'avis che l'Eritrea saja ina dictatura. Sche la situaziun sa midia, lura possia era la Svizra far cun l'Eritrea ina cunvegna da reacceptaziun, uschia ha ditg Sommaruga avant schurnalists. Il mument na saja quai però betg pussaivel.

Sommaruga reagescha uschia sin ina brev da la regenza dal chantun Lucerna. Lezza pretenda che persunas ord l'Eritrea n'obtegnian nagin asil pli a moda simpla.

Tenor la presidenta da la ConfederaziunI saja quai dentant difficil da respunder a questa brev cunquai che quella partia d'ina fallida idea fundamentala. I na saja betg uschia che la Svizra renconuschia automaticamain ils requirents d'asil ord l'Eritrea sco fugitivs.

RR novitads 14:00