Siglir tar il cuntegn
Inhalt

Svizra Soluziuns per chamonas da CAS èn sin via

Cun l'entschatta 2018 deactivescha la Swisscom cuntinuadamain la colliaziun da telefonia analoga. Per las chamonas da CAS è quai in problem. Radund 45 chamonas dovran ina soluziun. E quella n'è anc betg sin maisa.

Chamonda da Terri.
Legenda: La midada da telefonia analoga sin digitala è per chamonas da CAS in problem. Keystone

Telefonia è per chamonas da CAS da gronda impurtanza. Cun prender encunter reservaziuns po vegnir garantì in bun manaschi da chamona. La telefonia è però era impurtanta en cas d’urgenza. A partir dal 2018 èsi plaun plaunet a la fin cun telefonia analoga. I vegn la telefonia digitala. Uss dovra quai soluziuns per las chamonas dal Club alpin Svizzer.

La colliaziun via satelit n'è betg stabila.
Autur: Bruno LüthiCAS

Tenor Armin Schädeli da la Swisscom datti duas variantas pussaivlas: Ina è da guntgir sin la rait da telefonins (Mobilfunknetz), l'autra ina colliaziun via antenna da satellit. Bun 45 chamonas n'han betg access a la rait da telefonins e duvrassan ina soluziun cun antennas da satellit. E da questa soluziun n'èn betg tuts persvas. Era betg Bruno Lüthi dal CAS: «La colliaziun via satellit n'è betg stabila.»

Swisscom surpriglia custs da fin 20'000 francs

Per la communicaziun d’urgenza dovri er ina stabila colliaziun. E nua che quai n'è betg pussaivel dovri anc ina soluziun separada per pudair clamar agid.

E tenor Bruno Lüthi, è quai la gronda sfida. Vinavant dovra telefonia digitala era current electric. La Swisscom na saja betg responsabla per in tal provediment, di Armin Schädeli. Pia ha mintga chamona da procurar sezza per l’electricitad.

L'entira migraziun d’analog sin digital custa daners. E damai che la Swisscom ha da garantir il provediment da basa da telefonia per lieus en la periferia, surpiglia ella, tenor retschertgas da RTR, ils custs fin 20’000 francs. Tut ils custs che surpassan questa limita ston las secziuns, ch’en mintgamai possessuras da las chamonas, purtar sezzas.

RR actualitad 11:00