Fin october duai esser a fin cun la societad aviatica Belair. Quai ha communitgà il concern Air Berlin al qual Belair tutga. Las plazzas dals radund 280 emploiads sajan garantidas per in onn. Suenter duajan els survegnir offertas da lavurar tar Air Berlin.
Il plan da sgols en Svizra ed ils bigliets cumprads sajan vinavant valaivels. L'ultim eroplan duai sgular cun la fin dal plan da sgols da stad 2017. Enfin là opereschian quatter dals set eroplans davent da Turitg. Ils eroplans duajan vegnir vendids a la societad aviatica austriaca Niki che tutga medemamain ad Air Berlin.
Air Berlin cumbatta gia dapi onns cun problems finanzials. La societad Air Berlin è dapi l'onn 2015 sin curs d'expansiun. Senza agid finanzial dal pli grond acziunari, Etihad, fiss Air Berlin il pli probabel gia daditg dal Rain giu.
RR novitads 06:00