Siglir tar il cuntegn
Inhalt

Svizra SNB resta fidaivla a sia politica monetara

La Banca naziunala svizra resta fidaivla a sia politica monetara expansiva: Ils tschains negativs restan tar 0,75%. Plinavant saja la banca vinavant pronta dad intervegnir en la fiera da devisas. Cun questas mesiras vul la banca far nunattractiv il franc svizzer per investurs.

Porta da la SNB.
Legenda: La banca naziunala resta fidaivla a sia politica monetara. Keystone

Dapi l'entschatta da l'onn è il franc svizzer gia vegnì considerablamain pli flaivel en cumparegliaziun cun la munaida d'export principala, l'euro. Numnadamain ha il franc dapi l'entschatta da l'onn pers valita: l'entschatta dal 2017 era il curs tar 1,07 francs per euro la gievgia era el tar 1,1680 francs per euro.

Per la Banca naziunala svizra è la munaida indigena dentant anc adina memia ferma. Plinavant ha la banca communitgà ch'il franc na saja las davosas emnas betg pli vegnì pli flaivel. Perquai saja la SNB vinavant pronta d'intervegnir en la fiera da devisas per evitar in augment da valur da la munaida indigena.

Prognosa d'inflaziun

Economists publics ed analists èn dentant da l'avis che a la SNB sajan liads ils mauns entant che la Banca centrala europeica EZB n'auzia betg ils tschains. Cunquai che l'EZB vegnia però enfin il 2019 probablamain betg a far midadas da tschains, na possian ins betg spetgar memia bler da la banca naziunala svizra.

La prognosa d'inflaziun saja dentant tuttina in indicatur tempriv che la SNB veglia normalisar la politica monetara, uschia Maxime Botteron da la Credit Suisse. En sias prognosas quintan il survegliaders monetars cun ina chareschia da 0,7% il 2018 ed 1,1% il 2019.

RR novitads 11:00